De B u r r k a e w e r s in Berlin

Dies ist eine kostenlose Homepage erstellt mit hPage.com.

Stadtführung durch Wismar

- für die Coronapause -

zum Jahresende 2020 bei < Platt partu > im Internet gefunden von Ingrid

hier ward'n wi an uns'n Ulfluch 2010

na Wismar-Poel erinnert

Logo

Wismar
Wismer, Wismar, Wismaria, Wissemar ...

vun Gisela Reink

Dei meisten Biller köönt Sei dörch Anklicken vergröttern.
Torüch geiht dat denn mit den Torüch-Knoop in'n Browser

Twei Städer in uns Land sünd "Weltkulturerbe der Unesco" worden, wiel väle Hüser ut de Hansetiet in'n Krieg heilbläben sünd. De Unesco hett allerhand Geld rinsteckt, üm de Kirchen, Gäwelhüser u.s.w. tau sanieren un ünner Schutz tau stellen.

Wismar, Markt

Nu is noch werrer eine Finanzspritz dortaukamen. Schön sünd sei worden, de Hansestäder Stralsund un Wismar. Jedeiner in uns Land is stolt, dat disse schönen Buwarke noch dor sünd un erhollen warden. Ja, un wi hoffen, dat Wismar uns hüt in all siene Pracht anstrahlen deit.

So as lütte Vörutafdeilung willn Fru Tschorn, Fru Jenning, Fru Borz un ick uns per Bahn ierst mal ein Bild von Wismar maken, denn wenn wi later unse Fohrt mit Fru Böttcher maken daun, denn möten wi up den'n körtesten Wech na St. Georgen, wiel wi dor tau eine Führung anmeld't worden sünd — un dissen Wech will'n wi hüt säuken. Fru Tschorn hett väle Johrn in Wismar arbeit't, mien Mann wier Wismeraner. Ick denk, dat kriegen wi hen, denn wi kennen uns ganz gaut ut.

Wasserkunst. Klick up tau'n Vergröttern!

De Fohrt na Wismar is ümmer werrer ein Beläwnis, so as wenn ick na Hus kamen dau, wat jo ok ein bäten stimmen deit. Argern dau ick mi oewer werrer, as ick de vernagelten Bahnhoffshüser tau seihn krich. Vör mihr as 20 Johren har dat ümmer Wettbewerbe üm den'n schönsten Bahnhoff gäben, dor seegen de all nich so verloddert ut. Dor wiern de Bahnhoffshüser plägt, un Blaumen bläuhten hier un dor, so as Gruß up de Fohrt. Man kann ok wat ut de Vergangenheit oewernähmen, wenn man will. In Hornsdörp war ick unruhig, denn bald möt ick doch wat von Wismar tau seihn kriegen.

De Bahnhofstunnel in Wismar süht ümmer noch nich bärer ut un kann dörchut mit den'n in Warnemünd'n konkurrieren. Dat is hier un dor wohrhaftig kein Uthängeschild för all de Reisenden, de von wiether kamen daun. Doroewer möt de Bahn sick doch irgendeins ok einen Kopp maken.

As wi ut de Bahnhoffshall up de Strat kamen, oewerföllt de Stadt uns gliek mit ehre Schönheit. Gradoewer, dor wo de Frische Grube is, seihn wi all restaurierte Hüser. An dissen Grab'n, de in de Ostsee fleiten deit, gahn wi denn lang bet na de Schwiensbrück.

De Swiensbrüch is eentlich heel oolt...

...woor oewer 1994 nie utstaffeert...

...mit disse possierlichen Swien.

All Biller kannst per Klick vergröttern!

De vier lütten Bronzeschwien betrachten wi mit Vergnäugen, seihn, dat dat Schabbellhus noch saniert ward, un schmieten denn ein Og up de Nikolaikirch. Miteins hemm'n wi de Idee, uns' Fohrt mit de Backsteingotik tau verbinnen, un beträden disse grote Kirch.

Schabbellhus un Nikolaikirch in'n Achtergrund. Klick up tau'n Vergröttern!

St. Nikolai. Klick up tau'n Vergröttern!

Deip beindruckt kiek ick an de mächtigen Säulen hoch, de kein End'n tau nähmen schienen. 37 m hoch sünd disse gewaltigen Standbein, de dat Krüzrippengewölv drägen möten un dat ok könen. Wenn ick mienen Kopp ganz wiet in den'n Nacken bögen dau, denn kann ick de middelöllerlichen Malerien ünner de Kirchendeck sogor erkennen, un von dor baben hängt eine lange Metallkett' runner, de einen wunnerschönen Lüchter fasthollen deit. Wenn ick bedenken dau, dat unse Marienkirch in Rostock binnen bloten 33 m hoch is, denn möt ick doch staunen. Hüt hett de Kirchturm ein Dack, in dat Middelöller wier dor ein Turm, höger as de Petrikirchturm in Rostock, oewer niedriger as de allerierste Rostocker Nikolaikirchturm. Hemm'n de Hansestäd sick gegensiedig utsteken wullt, üm so ehre Macht tau demonstrieren?

Markt. Klick up tau'n Vergröttern!

De hütige Orgel keem in de achtiger Johren ut Freiberg in Sachsen, is formschön, klor gliedert un geföllt mi in ehre Einfachheit. Liekers süht sei mit ehre schwarten un sülbernen Farb'n ungewöhnlich mang de roden Backstein ut. De Kanzel an de eine Säul' paßt in de Farb'n oewer recht gaut tau de Orgel, allerdings stammt sei woll ut eine anner Tiet, wiel sei so pompös utseihn deit.

Miteins bün ick bass erstaunt. Hett sick disse Kirch för dat moderne Läben entschlaten — orrer is dat ok Marktwirtschaft? In den'n Turm gifft dat ein Turmcafé. Dat seech ich tauierst eins in Norwägen un künn dat sogor verstahn, wiel de Lüd einen wieden Wech bet na dat Gotteshus harn. In St. Petri, in Hamburg, verstünn ick dat nich, wiel man dor an jede Eck wat tau drinken kricht. Liekers wier ick eins froh, as ick dor in de Kirch einen warmen Tee bi Wintersküll drinken künn. Nu ok in Wismar, mitten in de Stadt.

St. Nikolai. Klick up tau'n Vergröttern!

Ick bün baff un dreih mi furts üm. Dor föllt mien Blick up einen wunnerschönen Flügelaltor, ganz gollen, mit herrliche schnitzte Figuren. Dat is Kunst!!! Donnerwetter noch mal tau! Dornäben ein Krüz mit Jesus. Wo har ick bloten ähnliche Arbeiten seihn? Ja, dat wier doch in dat Münster in Doberan. Disse beiden Kunstschätze gehüren na St. Georgen, dat kriegen wi so näbenbi rut.

Ick kiek oewer de letzten Bankreigen in Richtung Altor un seih, dat väle Plätze noch Namensschilder drägen daun, fein in olle Schrift. Sowat imponiert mi ümmer werrer. De välen hellen Grawstein dor up de Ierd sünd mit rode Klinker ümmuert worden un ergäben einen gauden Fautbord'n. Ob de Minschen, de dorup rümmer spazieren, doran denken daun, dat man früher in de Kirchen Minschen begraben hett? Ick glöf dat nich, denn de Inschriften sünd kuum noch tau läsen.

In den'n einen Gang seih ick denn eine richtige Allee von Holtskulpturen. Dat sünd siehr interessante Kunstwarke un siehr eigenwillige, denn olle Holtbohlen, utdrööcht, unbearbeitet, verrökert, utlaucht, dörch Bohrmuscheln lädiert, stahn uprecht. Sei hemm Köpp upsett't krägen, ahn Gesichter, fein poliert, herrlich masert, un billen tausamen eine wunnerbore Einheit. Woans sei de Köpp hollen daun! Allein all dormit drücken disse Figuren Freu', Leed, Hoffnung, Glück ut. Also nee, iehrer ick mi för moderne Kunst begeistern kann!!! Hier kann ick.

Holtköpp in St. Nikolai

Ob Balken, Bohlen, Brett un Pahl,
ob düster Schwellen, dat's egal,
'n Künstler bewohrte all'ns, wat olt
un schnitzte denn Köpp noch ut dröges Holt.
Köpp in Allee hemm'n minschlichen Drom:
"Olt as'n Bom
mücht ick ok warden."

Gisela Reink

De Nikolaikirch seih ick jeden Dach, denn ick heff de eins malt hatt, de Warerkunst ok. So har mien Mann ümmer siene Heimatstadt vör Ogen.

Zur Fortsetzung des Beitrages bitte hier anklicken (Textarchiv-5)

IngGa. und KlaHo. Juni 2015

aus dem Internet: 120 alte, teils vergessene Gegenstände mit Abbildungen und Beschreibungen in Platt

( www.heimatverein-achim.de: "Wat is dat denn" )

--> einfach anzuklicken ! --> leider überholt !